Kouman pou aplike pou yon dokiman vwayaj ak prepare pou nouvo entèdiksyon vwayaj la

Mizajou nan dat 20 mas 2025
Paj sa a te tradui pwofesyonèl pa yon moun. Aprann plis
Si w gen plan pou vwayaje deyò Etazini, ou ka bezwen yon dokiman vwayaj pou retounen. Sa baze sou sitiyasyon imigrasyon w. Aprann ki moun ki bezwen yon dokiman vwayaj, kijan pou aplike, ak kijan pou vwayaje san danje ak entèdiksyon vwayaj k ap vini an. 
Enprime

Nouvo entèdiksyon vwayaj

Administrasyon Trump lan prevwa anonse yon nouvo entèdiksyon vwayaj ki gen twa nivo restriksyon. N ap pibliye is final peyi yo byento, epi chanjman yo ka fèt rapidman.

  • Si w vwayaje nan yon peyi ki sou lis entèdiksyon vwayaj la, yo ka pa pèmèt ou retounen Etazini.Sa a aplike pou moun ki pa sitwayen Etazini yo, ki gen ladan moun ki gen Green Card ak viza yo.
  • Si w soti nan yon peyi ki sou lis entèdiksyon vwayaj la epi w vwayaje deyò Etazini pou ale nan nenpòt lòt peyi, yo ka pa kite ou retounen. Sa a aplike tou pou moun ki pa Ameriken Sitwayen yo, menm si ou gen yon Green Card oswa viza ki valid.

Planifye vwayaj ou an sekirite

Gouvènman ameriken aktyèl la gen règleman imigrasyon ki pi estrik. Si ou pa yon sitwayen ameriken, li enpòtan pou w planifye vwayaj ou avèk anpil atansyon.

Deside si w ta dwe vwayaje

  • Konsilte avèk yon avoka imigrasyon anvan ou planifye vwayaje. Yo ka ede w konprann risk yo, espesyalman si ou gen aplikasyon ki poko fini oswa si w soti nan yon peyi ki ka afekte pa entèdiksyon vwayaj la.
  • Si w pa gen papye, pa vwayaje entènasyonalman. Yo ka refize ou re-antre epi mete ou nan pwosedi pou depòtasyon.
  • Si w gen yon aplikasyon imigrasyon ki annatant, vwayaj ka afekte dosye w la. Kite Etazini pandan aplikasyon w ap trete ka lakòz refi.
  • Konsidere restriksyon sou entèdiksyon vwayaj yo.

Konsèy pou vwayaje an sekirite

  • Asire w tout dokiman ou yo valid. Viza ou ak paspò ou dwe ajou epi pa dwe ekspire. Non ki sou tikè avyon ou a ta dwe matche ak ID ou.
  • Kenbe tout dokiman enpòtan avèk ou, pa nan malèt ou tcheke. Sa gen ladan dokiman vwayaj ou, paspò, ID, resi aplikasyon annatant, enfòmasyon kontak avoka ou, ak kontak ijans ou.
  • Kreye yon plan sekirite. Pataje detay vwayaj ou ak kontak konfyans ou epi tcheke avèk yo pandan tout vwayaj ou a. Diskite sou sa pou fè si yo refize w re-antre oswa kenbe w nan detansyon.
  • Konnen dwa ou. Aprann kisa pou w atann nan ayewopò a ak kijan pou w reponn ofisye imigrasyon yo. Si yo kenbe w nan detansyon, mande pou pale ak yon avoka imedyatman.
  • Asire w ou suiv dènye nouvèl politik vwayaj anvan ak pandan vwayaj. Règleman imigrasyon yo ka chanje rapidman. Rete enfòme sou nouvo restriksyon vwayaj yo.

Kisa yon dokiman vwayaj?

Yon dokiman vwayaj fè gouvènman Ameriken an konnen plan vwayaj ou yo. Sa a se pou nenpòt moun ki pa yon sitwayen Ameriken men kiap viv nan Etazini. Ou ka itilize yon dokiman vwayaj olye pou yo yon viza kòm prèv otorizasyon vwayaj.

Ou dwe jwenn dokiman vwayaj ou anvan ou kite peyi a. Ou dwe montre dokiman vwayaj ou nan ayewopò oswa fwontyè a. Ou ap toujou bezwen paspò ou pou re-antre nan Etazini si w gen yon sèl.

Lè ou gen yon dokiman vwayaj, sa pa garanti ou ka re-antre Etazini. Customs and Border Patrol (CBP) ap verifye dokiman w yo epi deside si ou ka re-antre nan Etazini legalman.

Ki moun ki bezwen yon dokiman vwayaj?

Ou dwe gen yon dokiman vwayaj pou re-antre etazini si w gen estati a:

  • refijye oswa moun ki mande azil
  • Pwogram imanitè liberasyon kondisyonèl
  • TPS oswa DED
  • Aplikasyon pou TPS oswa Green Card ki anatant
  • Rezidan legal pèmanan epi yo pral andeyò Etazini pou 1 ane oswa plis
  • DACA oswa lòt estati tanporè epi yo gen yon rezon valab pou vwayaj

Poukisa mwen bezwen yon dokiman vwayaj?

Si ou kite Etazini san yon dokiman vwayaj, ou pral riske:

  • Pèdi estati imigrasyon ou a
  • Yo refize nenpòt aplikasyon annatant
  • Pa gen dwa tounen nan Etazini

Si yon ofisye CBP di ou pa gen dwa re-antre nan Etazini, ou ta oblije ale nan tribinal imigrasyon. Si w pa kalifye pou lòt soulajman imigrasyon, yo ka depòte w de Etazini.

Li enpòtan pou verifye avèk yon reprezantan legal imigrasyon anvan w vwayaje, espesyalman si w gen yon aplikasyon annatant. Menm ak yon dokiman vwayaj, nenpòt vwayaj andeyò Etazini ka mete aplikasyon ou an an danje.

Ki tip dokiman vwayaj yo?

Gen 5 kalite dokiman vwayaj:

  • Dokiman liberasyon kondisyonèl antisipe
  • Dokiman vwayaj refijye
  • Pèmi pou re-antre
  • TPS otorizasyon vwayaj
  • Dokimantasyon Transpotè

Kalite dokiman vwayaj ou bezwen depann de estati imigrasyon aktyèl ou. Pwosesis aplikasyon an se menm bagay la pou tout 5 kalite dokiman vwayaj.

Diferan dokiman vwayaj yo gen dat ekspirasyon diferan. Asire w ke dokiman vwayaj ou a valab e pap ekspire lè w retounen nan Etazini. Li enpòtan pou w konnen ki lè dokiman vwayaj ou a ekspire.

Dokiman liberasyon kondisyonèl antisipe

Liberasyon kondisyonel antisipe pèmèt ou retoune Etazini san w pa aplike pou yon viza. Ou kapab aplike pou yon dokiman librasyon kondisyonèl antisipe si w gen yon:

  • Demann Green Card an atant
  • Aplikasyon demand azil annatant
  • Demann TPS anatant
Li enpòtan pou sonje ke si w kite peyi a pandan ke aplikasyon ou a annatandan, ou ta ka rate avi enpòtan oswa demann pou enfòmasyon. Si w pa reponn a demann USCIS pandan w aletranje, yo ka refize aplikasyon w lan.

Dokiman vwayaj refijye

Yon dokiman vwayaj refijye pèmèt ou retounen nan peyi Etazini si ou se yon:

  • refijye oswa moun ki mande azil
  • Yon moun ki gen stati yon moun ki gen azil oswa refijye
  • Ki gen yon Green Card ki baze sou estati refijye oswa moun ki mande azil

Dokiman vwayaj refijye yo valab pou 1 lane.

Pèmi pou re-antre

Yon pèmi re-antre se pou moun ki vwayaje andeyò Etazini a pou plis pase 1 lane. Li pèmèt ou retounen nan Etazini san yo pa aplike pou yon viza retounen sòti nan yon anbasad Ameriken oswa konsila.

Ou ka aplike pou yon pèmi re-antre si w se yon:

  • Rezidan pèmanan
  • Rezidan kondisyonèl

Si w lwen Etazini a pou mwens pase 1 lane, ou pral sèlman bezwen montre Green Card ou lè w retounen.

TPS otorizasyon vwayaj

Si w gen TPS, ou dwe aplike pou otorizasyon vwayaj pou vwayaje andeyò Etazini. Si demann ou apwouve, USCIS ap ba ou Fòm I-512T pou montre ou gen pèmisyon pou vwayaje. Ou ka itilize dokiman vwayaj TPS ou kòm prèv vwayaj nan yon ayewopò olye de yon viza.

Si aplikasyon w pou TPS annatant epi ou planifye pou vwayaje aletranje, ou dwe aplike pouliberasyon kondisyonèl avanse Si sa apwouve, ou pral resevwa Fòm I-512L kòm prèv pou vwayaj.

Dokimantasyon Transpotè

Dokimantasyon konpayi asirans pèmèt konpayi avyon oswa transpòtè kite w monte nan yon avyon oswa lòt transpòtasyon transpòtè pou vwayaje tounen nan Etazini Sa a se yon aplikasyon separe de Fòm I-131A.

Ou ka aplike pou dokiman transpò si:

  • Green Card, libète pwovizwa alavans, oswa pèmi re-antre ou te pèdi, vòlè, oswa detwi
  • Ou se yon rezidan pèmanan oswa yon rezidan kondisyonèl

Kouman mwen ka aplike?

Pwosesis pou aplike pou yon dokiman vwayaj se jeneralman menm bagay la tou pou tout 5 kalite dokiman vwayaj yo. Ou ka aplike pou yon dokiman vwayaj ak USCIS nan ranpli Fòm I-131, Aplikasyon pou Dokiman Vwayaj. Ou ka presize ki kalite dokiman vwayaj ou mande nan Pati 2 nan fòm lan.

Li enstriksyon yo pou Fòm I-131 pou plis enfòmasyon sou ranpli li sòti. Ou dwe soumèt prèv tankou idantifikasyon foto w ak prèv sitiyasyon ou ak imigrasyon.

Ou ka ranpli aplikasyon w sou entènèt oswa voel pa lapòs nan yon adrès depo dirèk depandamman de estati imigrasyon w la. Jwenn konsèy pou depoze yon fòm sou entènèt.

Ou dwe aplike pou yon dokiman vwayaj anvan ou kite Etazini yo. Asire w ke ou verifye dele tretman yo plizye fwa anvan w planifye vwayaj. W ap bezwen dokiman vwayaj ou pou re-antre nan Etazini.

Kisa k ap pase aprè mwen depoze aplikasyon mwen an?

Ou pral jwenn yon avi nan lapòs la yon fwa yo aksepte aplikasyon w lan. USCIS ka mande plis enfòmasyon oswa prèv. Ou ka oblije ale nan yon randevou sèvis byometrik ak entèvyou.

Kouman mwen ka swiv sitiyasyon dosye mwen an?

Ou dwe ranpli Fòm G-1145 pou resevwa yon resi konfimasyon sou imèl oswa mesaj tèks. Ou verifye estati ka w la sou entènèt lè w antre nimewo resi w la.

Konbyen tan sa pran pou jwenn dokiman vwayaj mwen an?

Dele tretman dosye yo depan de kote w ye a ak tip demand ou a. Ou ka verifye dele tretman dosye sou entènèt.

Aprè w fin aplike, ou ka wè tan an tan yo estime pou dosye w la lè w konekte nan kont MyUSCIS ou a.

Èske mwen ka akselere dokiman vwayaj mwen an?

Si w gen yon rezon ijan ki fè w bezwen vwayaje, ou ka mande akselere (pi vit) pwosesis aplikasyon ou an. Ou ka mande pou pwosesis akselere a lè ou rele nan USCIS Contact Center.

Pwosesis akselere kapab disponib pou rezon sa yo:

  • Ijans tankou bezwen medikal, maladi grav, oswa lanmò yon fanmi pwòch
  • sitiyasyon imanitè
  • Pèt finansye grav
  • Aktivite ijan ki pa gen pou ojektif fe lajan.
  • Enterè gouvènman Ameriken yo
  • Efase erè USCIS

Tout demann tretman rapid yo fèt ka pa ka. Ou ka oblije soumèt plis prèv. Si w kite peyi a anvan ou gen apwobasyon, yo pa otorizew u retounen.

Èske mwen ta dwe pale ak yon avoka?

Li enpòtan pou jwenn èd legal lè w aplike pou yon dokiman vwayaj, espesyalman si w gen yon aplikasyon pou imigrasyon ki an kou Yon avoka oswa yon reprezantan ki akredite ka eksplike opsyon w yo epi ede w soumèt aplikasyon w lan Anpil òganizasyon ak avoka ofri sèvis legal gratis oswa a bon mache.

de fanm konsilte nan mi brik ki chita sou yon tab
Jwenn èd jiridik

Aprann kijan pou jwenn èd gratis oswa bon mache nan men avoka imigrasyon ak reprezantan legal de konfyans.

Kòmanse

Enfòmasyon ki nan paj sa a vini de USCIS ak lòt sous nou ka fè konfyans. Objektif nou se pou ofri enfòmasyon ki fasil pou konprann epi yo mete yo ajou regilyèman. Enfòmasyon sa yo pa konsèy jiridik.

Plis soti nan USAHello

K ap chèche enfòmasyon espesifik?